Türkiyənin Tokat bölgəsinin Reşadiyə rayonunda yaşanan və heyvandarlıqla məşğul olan 45 yaşlı Bayram Ö. 2011-ci ilin aprelində məhkəməyə müraciət edərək onu tərk edən arvadı, 32 yaşlı Serpildən şikayətlənib. Bayramın sözlərinə görə, arvadının yeni sevgilisi Murat D. onu tez-tez hədələyir, öldürəcəyini deyir.

Bayram şahid qismində 12 yaşlı qızı E.Ö.-nü də göstərib.
Lakin kiçik qızın İstanbuldakı məhkəmədə verdiyi ifadə hakimi heyrətləndirib.

"Reşadiyədə doğuldum, orada böyüdüm. Atam tez-tez içir, sərxoşluq edir, anamla dava edirdi. Günlərin birində anam bizdən ayrıldı və getdi. O vaxti 6-cı sinifdəydim. Atam mənə məktəbə getməyi qadağan etdi. Anamın birlikdə yaşadığı Murad da mənə zəng etdi, "Gəl, ananla birlikdə yaşa" dedi", - E.Ö. deyib.

Qız daha sonra bildirib ki, atası onu ərə vermək istəyib, iki dəfə müxtəlif kişilərə "hə" cavabı verib, amma Hatayda yaşayan anasının müdaxiləsindən sonra bu "nikah"lar baş tutmayıb.
"Daha sonra atam məni İstanbulda yaşayan dayımın yanına apardı. 8 ay əvvəl isə yerlimiz, 26 yaşlı Tuncaya ərə verildim. Lakin qaynatam yaşımı biləndə atama dedi ki, yaşım azdır, böyüyənə qədər atamın yanında qalım. Amma ərim razılaşmadı, məni buraxmayacağını dedi. Qaynatam da "Sən adda oğlum yoxdur!" dedi.

Ərim 3-4 gün sonra kirayə ev tutdu. Lakin atamın məhkəməlik olduğunu eşidəndə ondan şikayət etdiyini sandı və məni atasının evinə apardı", - E.Ö. söyləyib.

Kiçik qız daha sonra bildirib ki, hamiləliyin 3,5 aylığındadır: "Nə atamın, nə də ərimin yanına qayıtmaq istəmirəm. Anamın yanına getmək, oxumaq istəyirəm".