Corc Bayrounun şeirlərini təqdim edir.
XATİRƏN

Bu da sonuc!.. Hər şey ancaq yuxu imiş,
Al şəfəqlər sabahımın yoxu imiş.
O səadət, o heyranlıq bəs hardadır ?

Zalım qışın buz küləyi kəsir məni,
Dan yerimi yaxalayıb zülmət çəni.
Sevgimizin cah-cəlalı da dardadır.

Bərq vururdu ümüd... sönür yavaş-yavaş...
Ah, xatirən... xatirən də sönəydi kaş!

CON ADAMSA

Con Adams yatır burda - Santvell girəcəyində.
Yükdaşıyan. Ağzına stəkan daşıyırdı.
Ağlına gətirmirdi necə öləcəyin də.
Hər keflənmədən sonra əzablar başlıyırdı.

Bir gün də üzü üstə torpağa sərildi o,
Cəmdəyi sürüdüldü, evinə verildi o.
İçkini ömrü boyu o qədər qəbul etdi
Ki, vaxt çatdı, anında içki onu gillətdi.

KƏLLƏDƏN DÜZƏLDİLMİŞ PİYALƏDƏ YAZI

Qorxma: mən adi bir sümüyəm ancaq,
Sönmüş ruh haqqında fikirləri at.
Sümük piyalədən, bil, qopmayacaq
Axmaq sahibindən mənfur xatirat.

***
Sən tək içər, sevər, yaşardım mən də,
İndisə ölüyəm - doldur sonadək.
Nəfəsin şövq ilə mənə dəyəndə,
İyrənc qurd ağzından qurtuldum ,demək.

***

Qurdlar yumağını bəsləməkdənsə,
Şux şərab badəsi olmaq necə xoş!
Gəzirəm əllərdə qürurla mənsə,
Tanrı içkisiylə dolu və meyxoş.

***

Əql ziyasının taxtında budur,
Şərab köpüklənir üsyankar kimi.
Qurumuş beyinin yerində durur
Şərab - kəllə üçün əla deyilmi?!

***

Olsun ki, iylənmiş kəlləni nəvən,
Bir gün qazıb tapar. İç elə isə.
Üstündə... bir kəllə piyaləykən sən,
Yeni zərrin çevrə başlayar rəqsə.

***

Baş bizə nə verib sağlıq vaxtları?
Miskin qərarlarla ömrü talayar.
Qurulandan sonra ölüm taxtları,
Heç olmasa, onda işə yarayar.