Qutulardan 6 qurudulmuş körpə çıxdı

Britaniya vətəndaşı həbs olunanda onun çantalarından çıxan "yük" gömrükçüləri şoka salıb. Çünki çantalarda südəmər körpələrin cəsədlərinin qurumuş qalıqları vardı. Tayland paytaxtı Banqkokun "Çin məhəlləsi"ndə tutulmuş 28 yaşlı Çou Hok Kuenin dediyinə görə, bu cəsəd qalıqları "müalicəvi əhəmiyyətə malikdir". Polis isə deyir ki, Honkonqda doğulan, sonra isə Britaniya vətəndaşı olan Kuenin çantasındakı cəsəd qalıqlarından qara magiya ayinlərində istifadə olunur. O, qurudularaq az qala mumiya halına salınmış cəsəd qalıqlarını Tayvana aparmaq istəyirdi. 6 cəsəd qızıl folqaya bükülmüşdü.
Polis zabiti Vivat Kumçumnanın dediyinə görə, "Bu ayin zamanı ana bətnindəki döl cərrahiyyə əməliyyatı ilə çıxarılır, öldürülüb qurudulur və sonra da qızıl suyuna çəkilir. Ayinin sonu həmin qalıqlar şər ruhlara qurban verilir və bununla da bəxtləri açılır". Tayvanın "qara bazar"ında belə cəsəd qalıqlarının hər biri 4 min dollara satılır.