Mobil rabitə: əsas telefon yox, kərpicdir

Ucqar dağ kəndində yaşayan Ho Van Tiunun həyəti həmişə adamla doludur. Tiunun həmkəndliləri onun həyətinə danışmaq üçün gəlirlər. Amma Tiu ilə yox - mobil telefonla, çünki bu həyət kənddə mobil telefonun şəbəkəni "tutduğu" yeganə məkandır. Stansionar telefona gəldikdə isə - nəinki kənddə, hətta rayonda belə, o tip rabitə yoxdur. Tiunun həyətindən savayı 60 km radiusdakı ərazidə mobil telefonlar "tutmur". Tiunun həyətində isə mobil telefonla danışmaq üçün aparatı evin divarında 1 metr hündürlükdəki dəlikdə olan kərpicin üstünə qoymaq gərəkdir. Bundan sonra mobil telefonun ekranında şəbəkənin varlığını göstərən xətt peyda olur. Telefon kərpicin üstündən götürələndə və ya "sehirli" kərpicin yanındakı kərpiclərdən birinin üstünə qoyulanda şəbəkə yenə itir.
Kıbay kəndində yaşayan Tiunun evinin divarındakı kərpicin radiodalğaları cəlb etməsi ilə bağlı müəmma hələ də çözülməyib. İnanılmaz, hətta gülməli görünsə də, Tiunun həmkəndliləri üçün indi yeganə çıxış yolu həmin "sehirli kərpic"dir. Tiunun dediyinə görə, hər söhbətə 5 dəqiqə vaxt verir.