100 ilin rekordu vuruldu

Amerikalı Nik Vallenda dünən unikal tryuku yerinə yetirib. Məşhur "Uçan Vallenda" kəndirbazlar sülaləsinin təmsilçisi olan Nik Niaqara şəlaləsinin üstündən çəkilmiş kanatdan keçib. Son dəfə belə tryuk 100 il əvvəl yerinə yetirilmişdi. Diametri 5 sm olan polad tros üzərində "gəzinti" Niaqara şəlaləsinin ABŞ sahilində başlayaraq 25 dəqiqə sonra şəlalənin Kanada sahilində başa çatıb. Vallenda yolu tropik tufan şəraitində qət etməli olub. Niaqarada gecə saatları olduğundan kanatı hər tərəfdən güclü projektorlar işıqlandırırdı. 550 metrlik yolda kəndirbazı səmada xilasetmə helikopteri, suda isə dalğıclar qrupu müşayiət edirdi. Onun ayağında anasının hazırladığı sürüşməyən altlıqlı mokasinlər vardı. Kanatda olarkən Vallenda naqilsiz qurğu vasitəsilə atası ilə əlaqə saxlayırdı. İlk dəfə Niaqara şəlaləsinin üzərindən kanatla 1859-cu ildə fransız kəndirbaz Jan-Fransua Qravle keçmişdi. Qravle son dəfə 1910-cu ildə şəlalənin üstündən keçmişdi.