Anasının bətnində öldü, sonra dirildi

Çəkisi 500 qram olan körpə ana bətnində ölü olsa da, qeysər kəsimi əməliyyatı ilə doğulandan sonra qışqıraraq ağlayıb. Uşağın anası 21 yaşlı Aleks Consdur. O, hamiləliyin 6-cı ayında olanda müayinə zamanı həkimlər bətnindəki körpənin iki həftə əvvəl öldüyünü söyləyiblər. Mertir-Tidvil şəhərindəki klinikanın 10 həkimi israrla bildirirdilər ki, Aleks təcili cərrahiyyə əməliyyatına məruz qalmalı, onun bətnindəki ölü döl çıxarılmalıdır. "İnanılmazdır, amma çox mürəkkəb əməliyyatdan bir neçə saniyə sonra uşaq nəfəs almağa başladı. Hadisənin unikallığı odur ki, anasının bətnində cəmi 6 ay qalan, çəkisi 500 qram olan uşağın nəbzi yox idi, amma o, özünə gələrək nəfəs aldı", - əməliyyatın aparıldığı "Prince Charles Hospital,"ın həkimi deyib. Anadan olandan sonra inkubatora yerləşdirilən və burada 5 aylıq reabilitasiya kursu keçmiş körpənin durumu indi normaldır. Ekspertlərin dediklərinə görə, Koenin doğuluşu mamaçalıq və ginekologiya tarixində çox nadir hadisədir.