Qulaq deşməyin tarixçəsi

Sırğa taxmaq üçün qulağın deşmə ənənəsi hələ eradan əvvələ gedir. Tarixi mənbələr qədim hindular, misirlilər və ərəblərin sırğa taxdıqlarından xəbər verir. Hələ qədim zamanlarda meyvə, aypara, gül, qalxan, tovuz quşu, durna və digər formalarda sırğalar düzəldilərdi. Qədim yunanlar həm özləri sırğa taxar, həm də pərəstiş etdikləri ilahələr üçün sırğalar düzəldərdilər. O dövrdə oğlan uşaqları yetkinlik yaşlarına çatana qədər sırğa taxardı. Roma qadınları da yunan qadınlarını təqlid edərək mirvari və briliyantdan hazırlanan bahalı sırğalar taxmağa başlayırlar.Eradan əvvəl sırğa taxmaq dəb halını alır, iş o yerə çatır ki, romalı kişilər kütləvi şəkildə qulaqlarını deşdirib sırğa taxmağa başlayırlar, bu isə imperatorun xoşuna gəlmir və buna qadağa qoyur. Orta əsr dövrü sona çatdıqda kişilər yenə sırğa taxmağa başlayırlar. Lakin bu dəfə yalnız sol qulaqlarına.