Qədr gecəsi, “Qədr” surəsində də qeyd edildiyi kimi “Quranın endirildiyi min aydan daha xeyirli olan, Allahın izni ilə ruh və mələklərin yer üzünə endiyi, dan yeri ağarana qədər salamatlıq, huzur və bərəkət qaynağı olan bir gecədir.”


Madam ki, bu gecəni min aydan daha xeyirli edən Quranın endirilməsidir, onda biz də, bu gecəni Quran oxumaq, anlamaq, yaşamaq və yaşatmaq ziyafəti təşkil etməliyik. Əsasən Quran ayələrinin mənasına və təfsirinə fikir verərək onu dərk etməyə çalışmalıyıq .

Bundan başqa, bu gecəni, nafilə (əlavə) namaz və dua ilə keçirmək tövsiyə edilir. Çünki peyğəmbərimiz “Kim inanaraq və Allah rizası üçün Qədr gecəsini ibadətlə keçirərsə, onun keçmiş günahları bağışlanar”. (Buxari, Leylətül-Qədr: 1.) buyurub.

Hz. Ayişə (r.a) deyir: “Qədr gecəsində necə dua edim?”deyə soruşdum. Rəsulullah bu duanı oxumağımı söylədi: “Allahım sən əfv edənsən, əfvi sevənsən, məni də əfv et”. (Tirmizi: Davât- 89.).

Bu gecə- bütün maddi və mənəvi nemətlərin, möminin qəlbinə yayıldığı, iki cahandakı bayram müjdəsinin möminin ürəyində hiss edildiyi, Quran, ibadət və orucla ruhun yüksəldiyini ağlın da dərk etdiyi bir gecədir. Belə bir gecədə, ilahi yardım sanki bir leysan kimi, möminin könlünü və zehnini sərinləşdirir. Onu dünya qayğılarından, dərdlərindən azad edir.

“Qədr”-dəyər, qiymət, ölçü və qüdrət mənasını daşıyır. Qədr gecəsinin dəqiq hansı gecə olduğu bilinmədiyi üçün, onun Ramazan ayının 27-ci gecəsi olduğuna qərar verilib. Hz. Peyğəmbər (s.a.s) də, bu gecənin ayın neçənci gecəsi olduğunu bildirməyib, ancaq: “Siz Qədr gecəsini Ramazanın son on gün içərisindəki tək rəqəmli gecələrdə axtarın” (Buxâri: Leylətül-Qədir- 3.) deyə buyurub.

Allah-təala Qədr gecəsini, eləcə də bəzi əlamətdar günlərin vaxtını gizli saxlayır. Məsələn: Duanın qəbul olunduğu an, cümə günündə gizlidir, əcəlin vaxtı ömürdə gizlənib və qiyamətin vaxtı da bu dünya zamanında gizlənib. Bütün bunların gizli tutulmağında məqsəd möminləri ayıq, diqqətli və davamlı olaraq ibadətlə