Belçikada 54 yaşlı bir nəfər 10 il ərzində 2 milyon dollar qazana bilib. Arlon şəhərində polis işləyən İvon Buvi bunun üçün qətiyyən əziyyət çəkməyib. Sadəcə o, müxtəlif oyunlar, müsabiqə və lotereyalarda iştirak edib. Mətbuat, radio və televiziyada, həmçinin mağazalar tərəfindən keçirilən müxtəlif aksiyalara qoşulan İvon yeni mebellə təchiz olunmuş ev, 33 avtomobil, xeyli məişət texnikası qazanıb. Bundan əlavə, polis işçisi həm də dünyanın bir çox ölkələrində bahalı otellərdə pulsuz dincəlib. Buvi deyir ki, o, bütün asudə vaxtını kitabxanalarda sualların cavablarını axtarmağa həsr edib. İvon bir dəfə supermarketdə 25 min şüşə "Coca-cola" alıb ki, uduşda iştirak edən kuponların hamısını əldə etsin. Bu aksiyanın yekununda o, Volkswagen Passat və daha iki maşın udub. “Coca-cola”ları sonradan ucuz qiymətə mağazalara satıb, maşınları da öz dilerlərinin vasitəsilə satışa çıxarıb.