Qripdən 99,9 faiz müdafiə edən sprey ixtira olunub

Amerikanın Ohayo ştatının alimləri artıq hər il qripdən əziyyət çəkən milyonlarla insanın dərdinə dərman tapdıqları iddiası ilə çıxış ediblər.

Araşdırmanın aparıcı rəhbəri Klivlend Universitetinin professoru doktor Frank Esper bildirib ki, yeni ixtira olunan Halo Oral Antiseptic hava-damcı yoluyla yoluxan mikrobların səbəb olduğu qrip kimi xəstəliklərə qarşı müdafiəni təmin edir: «Sprey xroniki ağciyər xəstəlikləri kimi ciddi tənəffüs yoları narahatlıqlarında da kömək edir».

Alimlər dərmanın təsirini 2009-cu il pandemiyasından bəri saxlanılan klinik H1N1 virus ştammında yoxlayıblar və çox müsbət nəticələr əldə ediblər.

Bundan əlavə, araşdırmaçılar spreyin göyöskürəyin 11 klinik ştammını da tamamilə məhv etdiyini müəyyənləşdiriblər.

Nəticələr göstərib ki, Halo Oral Antiseptic istifadədən sonra qida qəbul olunsa belə, ağzın içində 6 saata qədər mikrobları məhv edir. Və onun sadəcə üç dəfə istifadəsi kifayətdir.

Ohayo ştatında sağlıq mərkəzində işləyən doktor Mahmud Gannum da bu deyilənləri təsdiq edib: «Hava-damcı yolu ilə keçən xəstəlik və mikroblardan qorunmaq demək olar ki, mümkün deyil. Əsasən də insanların çox olduğu yerlərdə və səyahətlərdə… Bu ixtira immuniteti möhkəmləndirir və mikroblardan qoruyur».

Qeyd edək ki, sprey artıq ABŞ-da satışdadır.