Qədim Misir stomatoloqlarının metodu alimləri heyran edib

Qədim mumiyanın kəlləsi tədqiq edilərkən alimlər dişlərin müalicəsinin nadir üsulunu aşkar ediblər. Kompüter tomoqrafiyası göstərib ki, iki min il bundan əvvəl misirli stomatoloqlar "plomb" (çürük dişə doldurulan maddə) əvəzinə çox güman ki, sidr yağı hopdurulmuş kətan parçadan istifadə ediblər. Beləliklə, onlar bu yolla qidanın dişdəki boşluğa düşməsinə mane olublar, yağ isə ağrını yüngülləşdirirmiş. Alimlərin sözlərinə görə, onlar belə müalicə üsulu ilə ilk dəfədir üzləşirlər. Bu metod qədim Misir stomatoloqlarının iş metodlarının siyahısına əlavə edilib.