Nadir xəstəlik: oxumasa, görə bilmir

Nadir xəstəliyə tutulmuş 66 yaşlı britaniyalı Moyra Qlid yalnız oxuyanda görə bilir. Çünki o, mahnı oxuyanda göz əzələlərinin spazmları zəifləyir və qadın gözlərini açaraq ətrafa baxır. İngiltərənin Rekshem şəhərində yaşayan evdar qadın Qlid 2008-ci ildən bəri fokal distoniya xəstəsidir. Fokal distoniya xəstələrinin gözləri əzələ spazmı ucbatından daim bağlı olur və bilaixtiyar bağlanır. Xəstəlik ucbatından qadın, işini atıb, maşın sürməkdən vaz keçib və gözlərini aça bilmədiyindən kor kimi hərəkət etməyə başlayıb. Lakin günlərin birində xorda oxuyanda o, dirijoru gördüyünü anlayıb. Mahnı oxumağa başlayan kimi Qlidin həm də ağrıları kəsilir.