Həyatın faciə və möcüzəsi: 9 aylıq qız 7 dəfə əməliyyat olundu

O, vurt-tut 9 aylıq uşaqdır. Amma kiçik vücudu indiyədək 7 çox ağır cərrahiyyə əməliyyatına məruz qalıb. Həkimlər bu balacanı ölümcül xərçəng xəstəliyindən xilas etməyə çalışıblar. Və məqsədlərinə çatıblar. İngiltərənin Kent qraflığının 9 aylıq sakini Darsi Key xərçəng xəstəliyinin çox nadir forması olan infantil fibroskarma ilə doğulmuşdu. O, 7 aylıq kimya terapiyası kursundan keçib, qızcığazın 3 aşağı qabırğası və ağciyərlərinin bir hissəsi kəsilərək çıxarılıb. Darsinin valideynləri 32 yaşlı Maykl və 30 yaşlı Natali göz yaşları içində gülümsəyirlər. Axı onlar Darsinin gülən çöhrəsinə baxır, ümidlərini itirmirlər. Darsinin valideynlərinin dediklərinə görə, xərçəng geri çəkilib və buna görə bəxtəvərdirlər. "Möcüzədir, amma müayinə və müalicə zamanı Darsi bir dəfə də ağlamadı. Xəstəxanada hamı qızımızın daim gülümsəməsinə heyrət edirdi. Biz də məhz Darsinin sayəsində ruhdan düşmədik", - Natali deyib.