Sən-deyib, gözümü yumdum hər şeyə,
Baxmadım qismətə, bəxtə, taleyə,
Sənin daş qəlbinə yol tapım deyə
Özümdən yollandım, özümdən çıxdım.

Yollar ayrılınca, yanıb töküldüm,
Kül oldum, qəlbimdə küncə çəkildim,
Sən gedən yollara elə dikildim,
Odlu bir baxışla gözümdən çıxdım.

Səninlə üz-üzə qaldım son dəfə,
Gözünün içinə daldım son dəfə,
Nikbin bir ifadə aldım son dəfə,
Biryolluq silindim üzümdən, çıxdım.

Çığırıb qayıtma, dönmə demişdim,
Bir daha gözümdən enmə demişdim,
"Alış" öz hicrinə, sönmə demişdim.
Özüm tüstüləndim, közümdən çıxdım.

Soruşma bu adam hardadı, hanı?
"Əyil", tapdağına bax, məni tanı!
Sənin izlərinlə gəzdim dünyanı,
Özüm də bilmədən izimdən çıxdım.

Son görüş yerinə gələrəm sənsiz,
Özüm öz halıma gülərəm sənsiz,
Sənə söz vermişdim-ölərəm sənsiz,
Sən Allah...bağışla, sözümdən çıxdım.