Baxıb gözlərimin içinə bu gün,
Deyərkən sonuncu sözünü mənə,
Bəlkə də fərqində olmadan özün,
Tanıtdın sən əsil üzünü mənə.

Sən demə məhəbbət xəzinəsindən,
Seçəndə mən səni naşı seçmişəm.
Gözlərim qamaşıb gözəlliyindən,
Dəyərsiz, saxta bir daşı seçmişəm.

Qapılıb hislərin lal axışına,
Sən demə illərdir aldanmışam mən.
Dönüb pərvanəyə, bir baxışına,
Əcəlim üstündə dolanmışam mən.

Sən demə gizlənib mələk cildində,
İçində bir qara şeytan yatırmış.
Sən demə məhəbbət yox, ürəyində,
Məhəbbət adında ilan yatırmış.

Niyyətin məkirmiş, sözlərin yalan,
Gəzdiyin sevda yox, dövlətmiş, varmış.
Sənin iç üzünü tanıyan zaman,
Anladım, gözüm kor, qulağım karmış.

İndi həqiqəti öz dilin deyir,
Ömürlük aldana bilərdim sənə.
"Ziyanın yarsından dönməkdə xeyir",
Yaxşı ki, tanıtdın özünü mənə.

Baxıb gözlərimin içinə bu gün,
Deyərkən sonuncu sözünü mənə,
Bəlkə də fərqində olmadan özün,
Tanıtdın sən əsil üzünü mənə.