Noyabrın 5-də Azərbaycanın həbsxanalarında yayılmış və oğru dilində “proqon” adlanan məktubda yazılıb ki, kriminal dünyada Rövşən Lənkəranlı kimi tanınan Rövşən Caniyev daha “qanuni oğru” deyil, “Praym Kraym” İnformasiya Agentliyi yazır.

Bu barədə digər kriminal avtoritet, Lotu Quli adı ilə tanınan və hazırda 8 saylı həbsxanda cəzasını çəkən Nadir Səlifova yaxın şəxslər məlumat veriblər.

Məlumdur ki, oğru səlahiyyətlərinin dayandırılması haqqında “proqonun” altından 21 gürcü və 9 azərbaycanlı “qanuni oğru” qol çəkib. O da məlum olub ki, bu günlərdə Rusiyada Ded Xasan təxəllüslü Aslan Usoyanın təşkil etdiyi oğru toplantısı keçirilib. Rövşən Lənkəranlının “qanuni oğru” adından məhrum edilməsinə onun Cemal Mikeladze – Cemo ilə sıx dostluğu səbəb olub.

Qeyd edək ki, Rövşən Caniyev azərbaycanlı qanuni oğrular arasında Ded Xasan yönümlü olmayan yeganə şəxsdir.

“Proqonun” Bakı zonalarında yayılmasının arxasında isə kriminal dünyada Qoca Yasamalski təxəllüsü ilə tanınan Əlibala Həmidov dayanır.

Məlumata görə, oğru toplantısında qəbul edilmiş ikinci qərar isə Nadir Səlifovun – Lotu Qulinin statusunun bərpasına aid olub.

“Proqonda” həmçinin deyilir ki, bu qərar qəti və dönməzdir.