Bir şeir yazacam xatirələrdən,
Acılı, gileyli günlərim olub.
Çarəsiz keçmişəm dar küçələrdən,
Ümidim tükənib, gözlərim dolub.

Bir şeir yazacam uşaqlığımdan,
Xoşbəxt anlarıma qayıtmaq üçün.
Bir şeir yazacam qoçaqlığımdan,
Gücsüz anlarımı unutmaq üçün.

Bir şeir yazacam açan səhərdən,
Hər sabah bir ümid yaşatmağımdan.
Təzə yalanlara inanıb hərdən,
Əlimi boşluğa uzatmağımdan.

Bir şeir yazacam gecələrimdən,
Dərdimi yuxudan oyatmağımdan.
Zülmətə uzanan cümlələrimdən,
Qələm ortağımdan, söz ortağımdan.

Bir şeir yazacam gəlib-keçəndən,
Hərə bir ehtiyac qopardı məndən.
Könlümün, dilimin sadəliyindən,
Hər gedən bir ömür apardı məndən.

Bir şeir yazacam anama bənzər,
Qırışmış əllərin cəsarətindən.
Bir şeir yazacam atama bənzər,
Ağarmış saçların sükunətindən.

Bir şeir yazacam doğum günümdən,
Ümidlə baxırdım o dar küçəyə.
Kimi gözləmirdim qapımı döydü,
Birini gözlədim gəlmədi deyə…

Bir şeir yazacam səadətimdən,
Yolunu azmış da, yollarda qalmış.
Bir şeir yazacam məhəbbətimdən,
Onu da özgələr əlimdən almış..!