Sənsizləmiş gecələrdə
Sənli gecələr üçün darıxıram…
Yığın-yığın adam içində
bizə tənhalıq olan
küçələr üçün
darıxıram.
Küsüb-barışdığımız
günlər üçün
darıxıram.
Məktubunu gözləyib
Yollara baxıb darıxıram…
Verdiyin qızılgüllərin ölüsünə
baxıb-baxıb
darıxıram.
Arzuların işığında
Ümidimin qaranlığında
Səni axtarıram…
Gecələrin aydınlığında,
gündüzlərin toranlığında
səni axtarıram.
Səndədir səbrim, dözümüm
Sənsiz tapa bilmirəm özüm – özümü…
Əzizim, könüldaşım, mehribanım,
Qoyma sənsizlik qürbətində
Qəm oduna yanım.
Nə mənə yaraşır bu sızıltı , nə sənə…
Gəlsənə!

R. Rza