Bir vaxt düşməmişdi həsrət araya...
Məni o ayıma, ilimə qaytar!
İstərəm telimi bir də daraya, -
İsti əllərini telimə qaytar! Baxıb gözlərinə, görüb özümü,
Ürəyim eşgindən alsın dözümü.
Sənə həsr edirdim hər bir sözümü,
O xoş nəğmələri dilimə qaytar! Sən yoxsan, de qəlbim isinsin kimə?
Uçub əllərinlə qurduğun kümə.
İtən ümidləri sevən könlümə,
Ətri, təravəti gülümə qaytar! Nə qəmin sonu var, nə də gümanın,
Məhbusu olmuşam mən bu zamanın.
Gəl, məni hifz eylə, varsa amanın,
Zülmün verdiyini zülümə qaytar! Cüt qanad vermişdin daşıyım deyə!
Məhəbbət vermişdin yaşayım deyə!
Sənin olmadımsa yaşıyım niyə?!
Qaytar məni, gülüm, ölümə qaytar!