Adı çəkiləndə gözlerim dolur,
O, mənim sevgilim olub bir zaman.
Bənzərin görəndə gül rəngim solur,
O, mənim sevgilim olub bir zaman.

Könlümü sönməyən atəşə salan,
Bu cavan ömrümü eylədi talan,
Kədəri pay verib sevinci alan,
O, mənim sevgilim olub bir zaman.

Eşqimi dövlətə vara satıbdı,
Gecələr yuxuma haram qatıbdı,
Indi ayrılmışıq ,məni atıbdı,
O, mənim sevgilim olub bir zaman.

Pozubdu əhdini vəfasız olub,
Vaxtsız çiçek açıb vədəsiz solub,
Yar gedib qəlbimə qüssə qəm dolub,
O, mənim sevgilim olub bir zaman.

Həsrəti ağardıb , çallayıb telim,
Ixtiyar olmusam ,bükülüb belim,
Şeirdə yazanda titreyir əlim,
O, mənim sevgilim olub bir zaman.