İstərəm, dəyişim
sənlə yerimi,
Bu dəfə ruh sən ol,
bədən mən olum!
Özünün həsrəti,
intizarıyla
Qəlbini anbaan
didən mən olum!
Baxım ki, vicdanın
oyanacaqmı?
Ürəyin al qana
boyanacaqmı?
Canın bunca dərdə
dayanacaqmı?
Bu dəfə imtahan
edən mən olum!
Sən də gör, sən də
bil istəmək nədir!
Hər gecə gümansız
səsləmək nədir!
Yalançı ümidlər
bəsləmək nədir!
Gözləyənim sən ol,
gedən mən olum!