Mən ki, səndən istəmədim
göylərdəki kəhkəşanı,
Mən ki səndən istəmədim
Yeri, göyü - bu cahanı.
İstəmədim mənim üçün
Göydən ulduz qoparasan,
İstəmədim qollarında
nağıllara aparasan...
İstədiyim – ürəyimi isidəcək bir od oldu,
Sevə-sevə, 
nəvazişlə deyəcəyin bir ad oldu.
İstədim ki, 
sən də məni “ay sevgilim” çağırasan,
Yeri gəlsə, bulaq kimi nəğmə deyib,
yeri gəlsə, çaylar kimi 
haray salıb bağırasan... 
Məni necə sevdiyini bildirəsən
gündüz-gecə...
Oxşayasan hər gün məni
bax beləcə...
İstədim ki, 
unudasan küsüləri, yalanları.
İstədim ki, 
unudasan məndən öncə olanları.
İnanmırdım, 
həyatıma sən də həsrət gətirəsən...
Səndən çoxmu şey istədim mən, görəsən?