Baxdın gözlərimə yabancı kimi,
Müqəddəs sevgimi görə bilmədin.
Dəfn etdim qəlbimə nakam eşqimi,
Bu eşqə bir ömür verə bilmədin.

Mənasız göründü gözümdə cahan,
Səndən uzaq ikən keçmədi zaman,
Yaşadım,sabaha olmadı güman,
Adını həkk etdim şeirə bilmədin.

Deyirdim qəlbimə həmdəm olarsan,
Ömrümə ömürlük bir iz salarsan,
Mənə məhəbbətdən dünya qurarsan,
Məhəbbət dünyamı qura bilmədin.