Soruşsam ey gülüm, yerini demə,
Dodaq da bilməsin, dil də bilməsin,
Bülbüləm ovçuya yerimi demə,
Budaq da bilməsin, gül də bilməsin.
Gəl bir söhbət açaq səadətimizdən,
Ürəklər fəth edən hikmətimizdən,
Həsrəti biz qovaq qismətimizdən,
Fəsil də bilməsin, il də bilməsin.
Uçaq məhəbbətin səmalarında
Görüşək vüsalın röyalarında,
Ucalaq sevginin dəryalarında,
Tufan da bilməsin, sel də bilməsin.
Diləyim, istəyim budur Xudadan,
Bir uçan xalça da ensin səmadan,
Elə qaçırım ki, səni dünyadan,
Vətən də bilməsin, el də bilməsin !