Gəlim qaranlıqdan işığa sarı,
Sarı taleyimi işığa sarı...
Gözün gözlərimə işıq hasarı,
Ölüm, gözlərində dəfn eylə məni. Özgəyəm özümdə, özünə dönüm,
Söylə, deyilməmiş sözünə dönüm.
Mən göz aşiqiyəm, gözünə dönüm,
Ölüm, gözlərində dəfn eylə məni... Etdi yoxdan məni var baxışların,
Baxdım, dənələndi nar baxışlarin.
Səadət qibləmdi, yar, baxışların,
Ölüm, gözlərində dəfn eylə məni. Düşməyim gözündən bir an irağa,
Bük, bələ sən məni gözündə ağa.
Vermə əllərinlə qara torpağa,
Ölüm, gözlərində dəfn eylə məni. Qoy olsun məzarım qara gözlüyün,
Eşqin, sədaqətin, haqqın, düzlüyün,
Ölüm laylasında ölümsüzlüyün,
Ölüm, gözlərində dəfn eylə məni. Yoxdan varlığımı yaradan yarım,
Yaram yara alıb yaradan, yarım.
Məni eşqi ilə yaradan yarım,
Ölüm, gözlərində dəfn eylə məni. Ölüm neçə kərə, yenə doğ, ölüm,
Dərya gözlərinə dolum, boğ, ölüm.
İstər xəstə ölüm, istər sağ ölüm,
Ölüm, gözlərində dəfn eylə məni. Nə sərxoş bir xəyal, nə dəm səsidir,
Nə hicran nəğməsi, nə qəm səsidir.
Bu ölüm eşqimin qələbəsidir,
Ölüm, gözlərində dəfn eylə məni.. Elə ölüm, ölüm daha gəlməsin,
Elə ölüm, ölüm aha gəlməsin,
Elə ölüm, ölüm baha gəlməsin,
Ölüm, gözlərində dəfn eylə məni.