Çiyələk satırdı qoca müəllim
Dəllal arvadlarla eyni cərgədə.
Səsindən tanıdım, tutuldu dilim
Dedim yanaşmayım ona bu yerdə.

Ancaq bacarmadım, gedib baş əydim,
Üstümə soyuqluq leysanı yağdı,
Elə zənn elədim qoca müəllim
Dünyamı geriyə qaytaracaqdı.

«Peşiman olmazsan, al» — deyib, baxdı,
Baxdı, tanımadı o məni deyən.
Elə bil başımda ildırım çaxdı,
Nə deyim həyatın bazarına mən?!

Bir vaxt şagirdlərə romantikadan
Odlana-odlana o dərs verərdi.
Al, deyə yalvarır indi astadan,
Ay aman, gözlərim nələr görürdü?!

Şux boyu buxunu gərili yaydı,
Yaman amansızsan, ey gidi həyat!
Satılan o vaxtlı romantikaydı,
Əlimdə əsirdi indi bir manat!



P.S Şeirin adın dəqiq bilmədiyimdən, başlıqda ancaq şairin adın yazdım. Şeri köçürtdüyüm kitabda adı yox idi. Bir mənbəədəsə adı belə yazılmışdı — Romantika «satışı»