Payız havası qarışıb
bu bahar havasına.
Saralmış yarpaqlarını
küləklər uçuran
gül koludur könlüm.
Bu səhər də baxdım
poçt qutusuna,
ünvanıma məktub yox.
Bütün yalqızların
hasili,
bütün tənhaların
cəmiyəm bu gün.
Kapitanı ölmüş,
yelkəni yıxılmış
gəmiyəm bu gün.
Dənizin gözləriylə
özümü ağlayıram.
Küləyin ayağına
bir məktub bağlayıram.
Dalğalar ərşə qalxır,
dəniz məni itirir.
Dur küləyi qarşıla,
Sənə məktub gətirir.