Gecədən yağan yağış küçələrin dişsiz yerlərində -
çuxurlarında saysız-hesabsız gölməçə-güzgü
yaradıb. Səhər işə gəlmək üçün mindiyim
avtobusda o qədər adam vardı ki, maşının sol
tərəfi əyilmişdi, bir az da əyilsə, sürücü rahatlıqla
həmin gölməçə-güzgülərdən birinə baxa-baxa
təraş ola bilərdi. Avtobusun uzaq Sibirindən
(arxa oturacaqlarından) etiraz səsi yüksəlsə də,
xeyri olmadı. Bir neçə dayanacaq sonra, forma və
məzmunca ağırçəkili bir xanım avtobusa minib
maşının tarazlığını bərpa elədi.
Kaş Femidanın əlindəki tərəzinin də bəxti açıla...