İşıq desən yoluna
Çılçıraqlar düzərəm,
Hicran yükü çiynimdə
Ağır olsa dözərəm,
Düşərəm nağıllara,
Nağılları gəzərəm
Nağıl olmadığını
Bilsəm yalan deyirsən.

Dağlar sənə vurulsa
Yanar, qarı əriyər,
Daşa desən səninəm
Ayaq açar, yeriyər,
Qəlbim şəfəqlə dolar,
Ağlar könlüm kiriyər
Sən xeyal olduğunu
Bilsəm yalan deyirsən.

Şəkil versən oxşaram,
Sinəm üstə saxlaram,
Ümid versən gözlərəm,
Ürəyimi sıxmaram,
Meşələrə getmərəm,
Çəmənlərə baxmaram
Sən çiçək olduğunu
Bilsəm yalan deyirsən.

Düşünərəm dünyaya
İlk açılan səhərəm,
Ulduzları endirib
Yollarına səpərəm,
Başına dolanaram,
Əllərindən öpərəm
Məni sevmədiyini
Bilsəm yalan deyirsən.