Məni özümdən soruş!
Saxlama ayağını
Təsadüfən kimsə də haqqımda danışında.
Soruşma əhvalımı
Dostundan, tanışından.
Bir neçə ömür keçib
Bir neçə dünya dəyiş,
Ayır beşcə dəqiqə...
Məni özümdən soruş,
Bilsən də ki, çox zaman acı olur həqiqət;
Məndən soruş, sevgilim,
Saçlarımın baharı qarlaramı qarışıb,
Dəyanətli təkliyim xəyanətlə barışıb?
Yad təmasla isinib buzlayan əllərim də,
Ruhumun ağrısından diksinib tellərim də?..
Hara yoxa çıxıbdır gecələrin yuxusu,
Niyə qəmə qərq olub o bənövşə qoxusu?
Sənə açdığım sirlər kimlərə deyilibdi,
Sənsiz ölən sətirlər nə çətin can veribdi?
Sən onu məndən soruş,
Yalanların acısı necə çıxıb canımdan?
Qəlbimi yara-yara
Son ümid karvanları hara ötüb yanımdan?
Dərdimin ünvanısan! -
Məni eşitmək üçün
Bir neçə ömür keçib gəlmək istəməsən də!
Acı olur həqiqət...
Yaman olur həqiqət,
Bilmək istəməsən də!