Bir arzum var idi -
çıxıb qarşına
Görüşüb bir dəfə öpəydim səni.
İllərcə çəkdiyim həsrət adına
Tanrıdan çox şeymi istədim, yəni?!

Axtarıb içində elin-aləmin
Gözlərin gözümə baxaydı o gün.
Bu sevən qəlbimin, yanan qəlbimin
atəşi səni də yaxaydı o gün.

Tutaydın əlimi...
Deyəydin: Gedək!
Sən də bir qəribsən, mən də bir qərib.
Həyat çox şirindi, ömürsə gödək,
Qaçaq bu qürbətdən əl-ələ verib.

Sonra da saçımı sığallayaydın,
Uğruma keçəydin imandan, dindən...
Məni bu həsrətdən çəkib alaydın.
Gözlərim dolaydı sevindiyimdən.

Zamandan arxaya nə qalsa, bizim,
Bir günü, bir anı verməzdik bada.
Sevərdin, sevərdim səni, əzizim,
Dünyada heç nəyi salmadan yada!

Ümid şamlarıydı alışan... Tək-tək,
Soyuq sözlərinin yelinə söndü.
Nədənsə demədin, demədin gedək,
yeddinci səmadan yerlərə döndüm.

Nə yerə sığacaq, nə də ki göyə
Üzünü bir daha görmək istəyi...
Yadından heç zaman çıxmayım deyə
Hər geceə yuxuna girmək istəyi...