Nədən bitdi,bilirsənmi,bu sevgi?
Bir az səndən,bir az məndən incidi.
Erkən gəldi eşqimizin payızı,
Çəmən güldən, gül çəməndən incidi. Sən gedəndən sığal görmür tellərim,
Ötmür daha şirin-şirin dillərim.
Əllərinə həsrət qalan əllərim
Uzaq durdu, elə gendən incidi. Şəfqətinə təmənnalı ürəyim,
Hər sirrindən agah,halı ürəyim,
Səni sevən bu bəlalı ürəyim
Şübhələrə düşən gündən incidi. Vüsal məndən kənar gəzdi bu qışdan,
Küsüb durub, boylanır bir qarışdan.
Bəlkə elə alnımdakı qırışdan,
Saçlarıma düşən dəndən incidi? Sən də alış mənsizliyə bu gündən,
Fərqi nədi məndən oldu, ya səndən.
İnamımı güllələyib gedəndən
Şair könlüm yüz birindən incidi...