Adamsız qalanda adam kövrəlir,
Mənim sənsizliyim ölümdən kasıb.
Gedən qatarlar da qayidır, gəlir,
Tək sənin qatarın yolunu azıb...

Uşaq öz pulunu itirən təki,
Səni itirmişəm, tapmışam kədər.
Hər gecə qəlbimə daş basıram ki,
Daşlaşar ürəyim bəlkə bir qədər...

Yanımda deyilsən, qəlbimdə varsan,
Çağırsan yenə də gələ bilərəm.
Bəlkə də mən ölsəm sən ağlamarsan,
Amma sən ağlasan, ölə bilərəm...

Ümidim itmədi bir zərrə qədər,
Mən səni itirdim, tapa bilmədim,
Qopduqca təqvimdən aylar, fəsillər,
Mən səndən qopmadım,qopa bilmədim...

Ən gözəl sevgiydi, sevgimiz bizim.
Hər isti nəfəsdə,məni xatırla.
Sənə tək qarğışım budur əzizim.
Baxdığın hər kəsdə, məni xatırla...