Susdun, son görüşdə dinə bilmədin,
Çağırdım, o yoldan dönə bilmədin,
Səndən nə istədim, yenə bilmədin,
Qəlbini aldatdı hansı səs indi?
Kimdən xəbər alım səni bəs indi?

Göz yaşın, baxışın duyğularımda,
Son nəğmən sızlayan könül tarımda,
Məni həsrət dolu yuxularımda,
Hər gecə çağıran sənin səsindi
Kimdən xəbər alım səni bəs indi?

Yetişdi vüsalın acı sonu da,
Dəyişdi sevginin ruhu, donu da
Qoşa xəyalımız vardı, onu da,
Kiminsə xətrinə doğra, kəs indi
Kimdən xəbər alım səni bəs indi?

Gəlmişəm bəxtinə yar olmaq üçün,
Sən özün tələsdin ayrılmaq üçün,
Yenidən boynuma sarılmaq üçün,
Mənim bircə kəlmə sözüm bəsindi
Kimdən xəbər alım səni bəs indi?

Biz nəyi itirdik, tapdıq gör nəyi
Könlümdə şerimin acı köynəyi,
Son dəfə istədim səni görməyi
Bəlkə son günümdü, son nəfəsimdi?
Kimdən xəbər alım səni bəs indi?


muellif:Serdar Kerimli