Dəvət etdi, qonağıyam bağbanın,
Gülüstanın, gül şahıdı, qızılgül.
Boy atıbdı, gül-çiçəklər içində,
Sanasan ki, surahıdı qızılgül.
Aprel-mayda qönçələnər, yarılar,
Budağında xar dəstəsi sarılar,
Ləçəyindən şəhd aparar arılar,
Şana baldı, gülabıdı qızılgül.
Bülbül ötür, heyran edir hər kəsi,
Gül çöhrəsi bürüyübdü naləsi,
Qızılgülsə xarla alır nəfəsi,
Sızlar bülbül, pənahıdı qızılgül.
Qızılgüldü, gül bağının sultanı,
Xəstə düşən ürəklərin dərmanı,
Bülbülə qəsd etməyə var gümanı,
Məhəbbətin qınağıdı qızılgül.
Bir dənədi, aşiqlərin dilində,
Bəzəyidi,gözəllərin telində,
Ətrin saçır,həzin səba yelində,
Sevənlərin mətahıdı qızılgül.
Səhər-səhər qönçələri açanda
Tər gülləri müşkü-ənbər saçanda,
Şeyda bülbül başı üstə uçanda,
Könüllərin rübabıdı qızılgül.
Gül bağımız sığınıbdı bağbana,
Dövran sürür bağban ilə yan-yana,
Bir dəstə gül hədiyyəmdi canana,
Nikbin, eşqin marağıdı qızılgül.
23.05.2013