Yurdları yad etdik, yenə eloğlu,
O yerlərdə mən yoxamsa, ölmüşəm.
Səf-səfdi binələr, aranlı-dağlı,
O yerlərdə mən yoxamsa, ölmüşəm.
Sevdiyim el-oba, sözümün canı,
Sevmədim altunu, durru, mərcanı,
Görmürəm çölləri, eli, obanı,
O yerlərdə mən yoxamsa ölmüşəm.
Hanı o uşaqlar? Səngərə çıxaq,
Ətəkdə qulancar, bir də quzqulaq,
Dərin meşəsinnən sozu da yığaq,
O yerlərdə mən yoxamsa ölmüşəm.
Təhməz Tənəklidə bulaqlar başı,
Yığılıb dost-aşna, ürək sirdaşı,
Dumana bürünə dağların qaşı,
O yerlərdə mən yoxamsa ölmüşəm.
Vətən torpağında tikdim sarayı,
Qürbətdə nisgilim vətən harayı,
Aşıq dövran edə, yurdda may ayı,
O yerlərdə mən yoxamsa ölmüşəm.
Vətənə bağlıyam, xəyalım uçdu,
Baxıram gərdişə, bu dünya puçdu,
Oruc, yurduna dön, nə köçə-köçdü,
O yerlərdə mən yoxamsa ölmüşəm.