Qardaşı qardaşa düşman eyləyib,
Durub tamaşaya baxan dünyadır.
Üzü dönmüş altı üzlü zər kimi,
Yaxşılar evini yıxan dünyadır.
İtirib yaxşını yamanı tapan,
Dəyər dəyməzinə namərdə satan.
Xoş keçən günləri bir-birnə qatan,
Ürəklər yandırıb yaxan dünyadır.
Bir gün deyil, beş gün deyil dözəsən,
Yoldaş edir müxənnətlə gəzəsən.
Ha çalış ki, sən əlini üzəsən,
Gözündə şimşəktək çaxan dünyadır.
Necə bilmək olar bunun sirrini?
Ağlatmayan görməmisəm birini.
Bir sayıbdır ağıllını, dəlini,
Şər atıb aradan çıxan dünyadır.
Tərmeyxan bununla sən bəsə durma,
Bu qədər düşünüb beynini yorma.
Çalış sənətində sən naşı olma,
Verdiyini başa qaxan dünyadır.