Yenə bahar gəldi-güllər, çiçəklər,
Açılıb, bağlara yayıldı bir-bir.
Yatan kəpənəklər, yatan böcəklər,
Xoş bir ətir duyub, ayıldı bir-bir.
Çəmənə yayıldı el gözəlləri,
Hördülər çiçəklə ipək telləri.
Dərildi bir qucaq sevgi gülləri,
İncə barmaqlarla sayıldı bir-bir.
Torpağın tərkindən şirəni sorub,
Boy atıb sarmaşıq çəməni hörüb.
Hər gülün üstündə bir bülbül görüb,
Xarlar paxıllıqdan bayıldı, bir-bir.