Mənim zirvəm qar yağdıqca ucalar,
Kövrək ürək sevgisindən güc alar,
Sən qədrimi anlayanda gec olar,
Öz bəxtindən küsüb keçər həyatın.
Sevmə məni kasıb keçər həyatın.
Qismət belə...bir kənara qoy bunu,
Uduzmuşuq bu məhəbbət oyununu,
Peşman olub çarəsizcə boynunu,
Yetim kimi qısıb keçər həyatın.
Sevmə məni kasıb keçər həyatın.
Ürək verib bu sevginin əmrini,
Göz yaşıyla yoğurmuşam xəmrini,
Həsəd ilə sevənlərin ömrünü,
Ömür boyu pusub keçər həyatın.
Sevmə məni kasıb keçər həyatın.
Sənə gəldim, göyə çəkdin özünü,
Çox söz verdin,heç tutmadın sözünü,
Bir an gələr tənhalığın közünü,
Gözlərinə basıb keçər həyatın.
Sevmə məni kasıb keçər həyatın.