Candan övladına can yandıran insan,
Anadır,
Sanki, bir cismdir övladı, ona can Anadır.
Körpə vaxtında əlindən tutub, eşq ilə, sənin,
Tut əlindən qocalan vəqtdə hər an, Anadır.
Sevə bilməz Ana tək kimsə səni dünyada,
Özgələr damla, məhəbbət dolu ümman Anadır.
Olub asi, Onu incitsə də övladı əgər,
Yenə uğrunda edər canını qurban, Anadır.
Nə qədər sağdır, Onun ol nökəri, ey qafil,
Agəh ol, saf könül mülkünə sultan Anadır.
Taət etmək Ona, Allaha ibadət sayılıb,
Şükr elə varlığına, ne`məti - Sübhan Anadır.
Yenə möhtac olur övlad ona, şah olsa belə,
Öz duasıyla edən müşkülün asan, Anadır.
Dadı olmaz bu həyatın, Anasız, ey Əmri,
Ömrümün ləzzəti, şirinliyi hər an, Anadır.
Müəllif : Ağasəlim Əmri Binəli .