Çox gəzib seyr eylədim bu bivəfa dünyadə mən,
Görmədim nəfsin əlindən bir nəfər azadə mən.
Fırladıb dünya zərü ziba ilə abidləri,
Zahidi gördüm riyayi - zöhd ilə səhradə mən.
Fəsli - gül hirsiylə gülşəndə buraxmış rahətin,
Bülbülü gördüm tutulmuş naləvü fəryadə, mən.
Hər yaranmış nəfs ucundan bir - birin məhv eyləyir,
Görmədim bir kimsəni bir xoş olan sevdadə mən.
Görmədim kim bir fəqirə zülm edərkən, zalimin
Bir nəfər tutsun əlin, yetsin ona imdadə, mən.
Zalimi alqışlayan çoxdur cəhanda zülm üçün,
Yaxşılıq rəsmin tutan heç görmədim rö`yadə mən.
Mən ki, irad eylərəm xəlqə bu gün, Mail, özüm
Layiqəm eldən betər bəd nəfs ilə iradə mən.
Müəllif : Unudulmaz Ustadımız MərhumHacı Mail Əliyev.