Dilbərim, kuyinə Adəmliyi atdım gəldim,
Mən bu əlçatmaz olan arzuya çatdım gəldim.
"Satdı Adəm babamız cənnəti bir buğdayə"
Mən də dünyanı həmin qiymətə satdım gəldim.
Bəzi yolsuz yola gəlsin deyə çıxdım yoldan,
Nə qədər qafili qəflətdən oyatdım gəldim.
Məzlum aşiqlərinin ərzi var, ey Şah, sənə
Neçə gözdən süzülən qan yaşa batdım gəldim.
Dedilər vəslə şirinlik gətirən hicrandır,
Yolumu mən də bu zənn ilə uzatdım gəldim.
Nə qazandımsa fəna mülkdə dərd oldu mənə,
Bu günah dolu yükü çiynimə çatdım gəldim.
Sənin ünvanına, ey könlümü ünvan eləyən,
Bir ömür mən gecəni gündüzə qatdım gəldim.
Bu xəyal ilə ki gəlsin sonu sənsizliyimin,
Sənli dünyanı xəyalımda yaratdım gəldim.
Arifəm, etmə məzəmmət ki gecikdim azacıq
Qanı məndən bir ürək vardı yaşatdım gəldim.
Hacı Arif Buzovnalı