Sənə, ey yar dediyim kimsə, aman olmayacaq,
Elə fəryad edəcəksən ki duyan olmayacaq,
Aramızda həyəcan, hiss filan olmayacaq,
Məni bundan belə sevdirmək asan olmayacaq.
Görmüşəm əhdini yüz yol, təzədən əhd eləmə,
O zəhərdən yoğurulmuş dilini şəhd eləmə,
Özünü işvəli göstərməyə çox cəhd eləmə,
Məni bundan belə sevdirmək asan olmayacaq.
Mənə göz yaşların indi görünür xeyli gülünc,
Rəng dəyişməklə nə vardı qızıl olsaydı bürünc,
Ağlayıb dörd tərəfi bəsdi dolaşdın künc-künc,
Məni bundan belə sevdirmək asan olmayacaq
Gündə heykəl kimi qarşımda gəlib durma, çəkil,
Təzə rənglərlə əcayib görünür köhnə şəkil,
Bir il eşqində nə çəkdimsə mənə bəsdi min il,
Məni bundan belə sevdirmək asan olmayacaq..
Hacı Arif Buzovnalı