Bir qətrə gözüm yaşı neçə çeşmə yaratdı,
Onlar adının zümzüməsilə axır indi.
Onda sənə dillə dediyim kar eləmirdi,
Atəşlərə şerim səni hər gün yaxır indi.
Eşq əhli sənin adını baş daşıma yazdı,
Heyrətlə, təəccüblə keçənlər baxır indi.
Bir dəfə əlin dəymədiyi qəbrimə, zalim,
Topraq yaşıl otlarla bəzəklər taxır indi.
Sən məndən uzaqda,
Mən səndən uzaqda.
Qəmnak iki bülbül,
Sən başqa budaqda,
Mən başqa budaqda.
Gördükdə necə ərz eləyəydim sənə halım,
Nitqim yox idi, körpə kimi dilsiz idim mən.
Dərya mənə qəsd eylədi, aldı məni getdi,
Bir yanə əlim çatmadı, sahilsiz idim mən.
Zülfün tək uzanmışdı xəyalım sənə doğru,
Qürbətdə qəriblər kimi mənzilsiz idim mən.
Solmuşdu məhəbbət gülüm arzu çəmənində,
Meyl olsa da bu elmdə təhsilsiz idim mən.
Sən məndən uzaqda,
Mən səndən uzaqda.
Qəmnak iki bülbül,
Sən başqa budaqda,
Mən başqa budaqda
Haci Arif Buzovnali