Yadıma düşmüsən yenə bu gecə,
Vəfasız, mən səni unudum necə?
Mənim saf eşqimi almadın vecə,
Get, sənə yaxşı yol, əlvida daha...

Məhəbbətə daha inanmıram, bil,
Demək, sənə sevgim önəmli deyil...
Özgəsiylə dolan, onu sev, sevil,
Onunla yaşa dol, əlvida daha.

Olmayacaq səni mənimtək sevən,
Ürəkdən sevmədin heç vaxt məni sən.
Səni xoşbəxt edə bilmədimsə mən,
Özgəylə yaşa dol, əlvida daha.

Əzab verdin hər gün, məni sevmədin,
Bu olmadı mümkün, məni sevmədin.
Kasıbam, onunçün məni sevmədin?
Özgədə pullar bol, əlvida daha..!

*Təşəkkür edirəm..! Oxuyan gözləriniz var olsun..!*