Ayrılırıq, uğur olsun yoluna
Bundan sonra sevməyindən mənə nə?
Xatirəmdə göz yaşların qalacaq,
Kinayəli gülməyindən mənə nə?

Hər günahı qəbahətin bilmədin,
Məhəbbətin yolu çətin ,bilmədin,
Bu sevgini səadətin bilmədin,
Bunda sonra bilməyindən mənə nə?

Xatirən yox, ömrüm boyu saxlayım,
De hardasan, hərdən gəlib yoxlayım.
Gözlərimdə yaş qalmayıb ağlayım,
Bundan sonra gülməyindən mənə nə?

Qopub getdi son ümidin yarpağı,
Həsrət əkib, dərd böyüdüb torpağı.
Sən olmadın dərdlərimin ortağı,
Bundan sonra bölməyindən mənə nə?

Bu sevgidə düz sözünü görmədim,
Özgə oldun,heç özünü görmədim,
Sağlığında xoş üzünü görmədim,
Bundan sonra ölməyindən mənə nə?!