Sən həmin deyilsən, çox dəyişmisən,
Bir dondan başqa bir dona keçmisən.
Ayağım altına özün düşmüsən,
Sənə yer vermişdim gözümün üstə..
***
Elə öldürmüsən körpə sevgimi,
İnan ki, sevmərəm bir də heç kimi.
Özünlə səhv salma, mən sənin kimi
Çörəyi yemirəm dizimin üstə..
***
Mən biraz ağıllı, biraz da dəli,
Tərpənmir əhdimin ayağı, əli.
Nə geri gedirəm, nə də irəli,
Hələ də durmuşam sözümün üstə..
***
Addımım günahkar, izim günahsız,
Günahsız dilimdə sözüm günahsız,
Həmişə olsam da özüm günahsız,
Qınadım özümü özümün üstə..
***
Hələ ki bahardır, boranlı qışda,
Gözündən qəlbinə yağan yağışda,
Mən gedən yollarda, eniş-yoxuşda
Gün gələr, düşərsən izimin üstə..