Unut, nə olubsa, hər şeyi unut,
Eybi yox, gözünün biri nəm olsun.
Unut ki, mənim də vicdanım rahat,
Təsəlli tapacaq bəhanəm olsun.
Vaxtıdır, uzaq et dərd-səri başdan,
Elə lap incisən, küssən yeridi.
Nə qədər gec deyil, lap bəri başdan,
Məndən ümidini kəssən, yeridi.
Daha mənasızdı hər şeyin sonu,
Ağlamaq, sızlamaq eynimə gəlmir.
Sənin o biçdiyin xoşbəxtlik donu,
İndi mən neynim ki,əynimə gəlmir?!
Yollardan izimi,tozumu çəkib,
Ölmədim,həyatı sağ ortaladım.
Bütün arzulardan gözümü çəkib,
Qəlbimi sevməkdən siğortaladım.
Bu göylə əlləşən adamı unut,
Axtar,tap,bərk yapış öz adamından.
Heç özüm özümdən xeyir görmədim,
Axı, nə umursan söz adamından?
Unut o sevginin anısın daha,
Qoru bundan sonra ismət, arını.
Nə saçın əlimi tanısın daha,
Nə də dodaqların dodaqlarımı.
Unut, nə olubsa, hər şeyi unut,
Eybi yox,gözünün biri nəm olsun.
Unut ki,mənim də vicdanım rahat,
Təsəlli tapacaq bəhanəm olsun...