Bir vaxt ürəyimə yol axtarırdın,
Indisə yolunu saldın üzümdən.
Bir zaman sədaqət,vəfa deyirdin,
Dillərə düzülüb düşdün gözümdən.


Ruhumu oxşayan sevimli candın,
Içimdə alışıb, içimdə yandın,
Bütün vücudumu gəzdin,dolandın,
Axır ki,süzülüb düşdün gözümdən.


O yuxa ürəyim lal daşa döndü,
Ömrümün baharı sərt qışa döndü,
Varlığın gözümdə bir yaşa döndü,
Sadəcə sızılıb düşdün gözümdən.


Əlinə xəyanət bayrağı alıb,
Qəlbimdən gözümə qəm yolu salıb,
Bir az kirpiyimdən sallaşı qalıb,
Nəhayət üzülüb düşdün gözümdən.


Kimi istəyirsən onu da qına,
Xəliləm,qoymaram qürurum sına,
Nadan vəfasızlar siyahısına,
Əbədi yazılıb düşdün gözümdən