Bu səfər qəlbimə elə dəymisən,
Bir daha səninlə barışan deyil.
Hər gecə şəklimlə danışsan belə,
O şəkil dil açıb danışan deyil…

Kağız ürəyimi ələ alarsan,
O sənə peşmanlıq gətirər ancaq.
Nə qədər səsləsən, çağırsan belə,
Xəyallar özünü yetirər ancaq

Otağın qoxusu, acı göz yaşı,
Dumanlı-çiskinli hala düşərsən.
Heç nəyin fərqinə varmazsan o an,
"Qabağa gedərsən, dala düşərsən"

Anidən ayılıb azan səsinə,
Ətrafa baxarsan, çölə baxarsan.
Canını yandırar papirosun da,
Üstünə tökülmüş külə baxarsan…

Əlini gətirib boyun ardına,
"Səni görməliyəm" deyib durarsan.
Məni qabağında görürmüş kimi,
Başını aşağı əyib durarsan…

Bunu mən demirəm, ürəyim deyir,
Səndən inciyən də, küsən də odur.
Mən başa düşmürəm ürəyimi də,
Adın səslənəndə əsən də odur.

Bir kərə, "bağışla" desəydin, mənə,
Hər şey də tam fərqli ola bilərdi.
Zərrəcə məhəbbət görsəydi səndə,
Kağız ürəyim də dilə gələrdi…